ထိုနေ့ခရီးတို - ၂

အပေါ်ကိုရောက်တော့ ချမ်းလိုက်စိမ့်လိုက်တာမပြောနဲ့။ ဟိုတယ်ကြီးနှစ်ခုရှေ့ကိုရောက်။ ဓါတ်ပုံတွေအသားကုန်လှိမ့်ရိုက် တစ်ယောက်တစ်လှည့်ရိုက်၊ အပူးလိုက်ရိုက်၊ အဖွဲ့လိုက်ရိုက်၊ ရှုခင်းတွေရိုက် စုံလို့။ ကိုယ့်လိုလူတွေကလည်း အုံနဲ့ကျင်းနဲ့လေ။ လှလိုက်တဲ့ မြင်ကွင်းတွေ....

ရိုက်ကြပြီးတော့ ဗိုက်တွေကဆန္ဒပြလို့ စားစရာဆိုင်လိုက်ရှာကြတယ်။ ခန်းမကြီးထဲဝင် မြေအောက်ထပ်ဆင်း နောက်တော့ ကြက်ဆီထမင်းပူပူလေးစားချင်တာနဲ့ KFC ပဲသွားကြတယ်။ Soup ကို တစ်မူထူးပြီး နှစ်ခွက်ဝယ်လိုက်တယ်။ စားပြီးရင် chicken meatball လေးထိုင်စားဖို့။

ဗိုက်ကလေးကယ်သွားတော့ ခရီးဆက်ခဲ့ကြတယ်။ ကစားကွင်းထဲဝင်ဖို့ အတော်တော့လျှောက်ရသား။ ဒါပေမယ့်လည်း ဇောနဲ့ဆိုတော့ သတိတောင်မထားမိလိုက်ဘူး။ ဟိုငေးသည်ပြော.. ဟိုငမ်းသည်ကြည့်.. တစ်လမ်းလုံးရယ်နေကြရတာပါး)

အဲ့ဒီ အထက်တံတားပေါင်းမိုးကြီးအတိုင်း လျှောက်လာရင်း အောက်က မြင်မြင်သမျှတွေကို တစ်ဝကြီး လိုက်ကြည့်တော့တာ။ အသစ်အဆန်းရှုခင်းတွေအပြင် အချောအလှအမိုက်စားတွေ ဒီနေ့မှ ပိုပေါနေသလားလို့။

ကစားကွင်းရှေ့တော့ရောက်ပြီ။ လက်မှတ်ဝယ်ဖို့ တန်းစီနေကြတဲ့သူတွေကိုတွေ့ပြီး လန့်သွားတယ်။ ဒါနဲ့ အဖွဲ့ထဲက ကျားကျားယားယားလူကြီးက တစ်ယောက်တည်းပါလေတော့ သူပဲကံဆိုးသူမောင်ရှင်ဖြစ်ပါတယ်။ အားလုံးပိုက်ဆံတွေထုတ်ပေးပြီး သူကအနစ်နာခံဝင်တန်းစီလေပေါ့။ ကျွန်တော်ကတော့ အချိန်ရသမျှလေး ဟိုတယ်တွေ၊ စားသောက်ဆိုင်တွေထဲလိုက်ကြည့်တာပါ။ သိတယ်မှတ်လား သိပ်အေးရင်ကျွန်တော်က ဆီးရွှင်ရွှင်ရယ်ဆိုတော့ toilet လိုက်ရှာရင်းနဲ့ ရောက်ရောက်သွားတာကများပါတယ်.. (ဟိတ်.. ကားပေါ်က ရေဗူးမှောက်ကျတာနဲ့ လာမရောနဲ့နော်.. ဟိုဟာက အတည်။ အဲဒါရေးမိပြီးကတည်းက လာလာစ နေကြတာ ခုထိမပြီးတော့လို့.. )

ဟိုတယ်ထောင့်တစ်ထောင့်မှာ ချောင်ကပ်နေတဲ့ပန်းချီးကားတချို့လည်းရှိတယ်။ ဘယ်သူမှ သိပ်ဂရုစိုက်မနေကြဘူး။ ကျွန်တော်ကသာ တစ်ခုစီကို စိတ်ဝင်တစားလိုက်ကြည့်ဖြစ်တာ..

အပေါ်စီး ဟိုတယ်ထက်က မြင်ကွင်းတွေ..

ကောင်းနေတုန်း ဖုန်းဆက်ပြီးလှမ်းခေါ်တာနဲ့ ခပ်မြန်မြန် ကစားကွင်းဂိတ်ပေါက်ဝကို ပြေးရတယ်။ သူတို့က ၀င်ဖို့ စောင့်နေကြတာ။

ကဲ ရောက်ပြီအထဲ။ ဥဒဟိုလှုပ်ရှားနေတဲ့လူတွေရယ်၊ လေထဲပျံနေကြတဲ့လူတွေရယ်၊ ရေစိုစိုရွှဲနေကြတဲ့လူတွေရယ် အဖုံဖုံပဲ စတွေ့လိုက်ရတယ်။

ဘယ်ဘက်အတိုင်းလျှောက်မိတော့ တောင်ကုန်းပေါ်က အဆောက်အဦဟီးဟီးကြီးတစ်ခုကဆီးလို့။ ရေတံခွန်ငယ်တစ်ခုက သူ့အောက်မှာ ၀ပ်တွားနေတယ်။ သူ့ကိုတောင်ရဲ့ထိပ်အမြင့်ဆုံးပဲလို့တွက်လိုက်မိတာ နောက်တော့မှ ကိုယ်မှားမှန်းကို အသည်းတအေးအေးနဲ့သိလိုက်ရတယ်။

ပထမဦးဆုံး plan ချကြတယ်။ ဘာစီးပြီး ဘယ်တွေအရင်သွားပြီးမှ ဘာလုပ်ကြမယ်ပေါ့။ အားလုံးသဘောတူပြီး ဦးဆုံးစပြီးစီးမယ့် နေရာဆီချီတက်ခဲ့ကြတယ်။

စက်လှေခါးနဲ့ထပ်တက်ရသေး..။ လမ်းတစ်လျှောက် အာတပြဲပြဲနဲ့အော်နေရှာတဲ့ လှောင်အိမ်ထဲက ငှက်စိမ်း၊ ငှက်ဖြူ၊ ငှက်ဝါ၊ ငှက်ကျားတချို့.. ရေချမ်းအိုးလေးတစ်ခု.. အပင်ခပ်စိမ်းစိမ်းတစ်စု...

မြေပုံကိုင်ရင်းသွားတော့ ရောက်ပါပြီ စီးရမယ့်နေရာဆီ...

စိတ်ညစ်လောက်အောင်တန်းစီရဦးမယ်ဆိုမှ နေကနည်းနည်းထွက်လာတယ်။ တော်တော်ကြာလိုက်တယ် နေပူတာ.. လူအုပ်ကလည်း ထုံးစံအတိုင်းမနည်းမနောမှတ်လား

လူတန်းကြီးရဲ့အလယ်လောက်ရောက်လာတော့ နေမထွက်တော့ဘူး။ ကောင်းရော အချိန်ကိုက်ဒုက္ခပေးသလားမှတ်ရတယ်။ တံတားကိုဖြတ်ပြီး တန်းစီစောင့်ရတာဆိုတော့ အပေါ်ရောက်တုန်း ပတ်ဝန်းကျင်ကိုအစုံကြည့်ဖို့ အခွင့်ရသွားတယ်။ တံတားအောက်ကလမ်းပေါ်မှာ ပြိုင်ကားအပျော်တမ်းစီးနေသူတွေ။ တဒုတ်ဒုတ်နဲ့ ဖြတ်ဖြတ်သွားတဲ့ပြိုင်ကားတွေကို အပေါ်ကနေလိုက်နောက်ကြသေးတာ။ ဟော.. ဟိုမှာ တောင်ကုန်းတစ်ခုတွေ့ပြန်ပြီ။ မြင့်သထက် မြင့် မြင့်လာတာချည်းပါလား။ အခုတော့ သည်းသည်းကွဲကွဲမြင်ရသေးတယ်။ ခဏနေတော့ ရုတ်တရက်မှောင်လာပြီး မိုးစက်တွေကျလာတယ်ဗျ။ အံ့ရော.. မိုးပေါက်တွေရဲ့သိပ်သည်းဆနဲ့ ရှိရှိသမျှမြူမှုန်တွေ နှင်းတွေကလည်း အောက်ကို အဖွဲလိုက် အဖွဲလိုက်ကျလာတာ ရက်ရက်စက်စက်။ လေကတဖြူးဖြူးနဲ့အေးစိမ့်ပြီး တံတားပေါ်ကိုဖြတ်တိုက်လာတဲ့ မြူတွေကို အရူးလိုပဲလက်နဲ့လိုက်ဖမ်း ၀ါးစား မျက်နှာအပ် ဆော့ကစားပေါ့။ သိပ်ပျော်တယ်။

အဲ.. ပျော်တာကချက်ချင်းရပ်သွားပြန်တယ်။ “We're going to stop the machine for a while raining. A few minutes only” တဲ့ .. နင်သဟ.. ဒီလောက်အရှည်ကြီးစောင့်လာပြီးမှ လှည့်ပြန်မယ့်သူက တစ်ယောက်မှမပါ။ ဒါကလည်း ထုံးစံကိုး။ သူတို့မှာက သတ်မှတ်ထားတဲ့ စံချိန်စံညွှန်းမိုးလေ၀သအချက်ပေးစက်တွေက နေရာတိုင်းမှာရှိတယ်.. မိုးရွာထဲစီးကြလို့မှမဖြစ်။ တစ်ခါပြုတ်ကျဖူးတယ်ဆိုပဲ။ Final Destination 3 ကိုတောင်သတိရသွားသေး .. ဟေဟေး..

ခဏနေ မိုးကွဲသွားပေမယ့် နှင်းတော့မစဲသေးဘူး။ ဒါပေမယ့် စက်ပြန်လည်လာတဲ့အချိန်မှာ ထ အော်မတက်ပျော်လိုက်ကြတာမပြောနဲ့ ။ အချိန်က ၄၅မိနစ်လောက်ဖြုန်းလိုက်ရပြီလေ.. မပျော်ဘယ်ရှိလိမ့်။ ကိုယ့်အလှည့်ရောက်ဖို့ ရင်ခုန်စွာစောင့်ကြရင်း မြူတွေကြားထဲ ဒုက္ခလာခံနေတဲ့ ကိုယ့်လိုလူသားတွေကို စိတ်လှုပ်ရှားဖွယ်အော်ဟစ်သံတွေကြားထဲကပဲ ငေးကြည့်နေမိတာ..

အံမယ်.. အပြောသာကောင်း.. ကိုယ့်အလှည့်လည်းကျရော အော်လိုက်ရတာဆိုတာ။ ဘေးကတစ်ယောက်က ကိုယ့်ထက်ပိုဆိုး။ နားကွဲတော့မယ်အော်နေတာ။ ဒုက္ခနှစ်ခု တစ်ပြိုင်တည်းခံနေရတာလေ။ ဝေါခနဲ ဝေါခနဲ ပြန်ပြန်ပြုတ်အကျတွေ၊ တွန့်လိမ်နေတဲ့အကွေ့တွေမှာ လူကဇောက်ထိုးဖြစ်သွားတာတွေ .. ပျော်လည်းပျော် အော်လည်းအော်ပေါ့။ စီးပြီးတော့ အသံတွေဝင်၊ ခေါင်းတွေချက်ချင်းကိုက်လာ.. ဖြစ်ပြီ မောင်တွန်တို့။ အိပ်ရေးမ၀ခဲ့ဘူးမှတ်လား။ “ဆေးပါကြလား ဆေး..” ဆိုပြီး လိုက်မေးပေးရ.. တော်သေး Panadol ကို တစ်ယောက်ကထည့်လာမိပေလို့။ ခပ်မြန်မြန်သောက်ချနေတုန်း တိတ်သွားတဲ့မိုးက ဖွဲဖွဲလေးပြန်ကျလာပြန်ပါရော.. မြူတွေကိုလည်း တစ်အုပ်ကြီး ထပ်ခေါ်လာပြန်တယ်။ လှတာတော့အတော်လှ .. မူးမူးကိုက်ကိုက်နဲ့ ဓါတ်ပုံကတော့ အမိအရရိုက်လိုက်သေး။

မြှားပစ်ဆောင်ဆင်ဝင်အောက်ခဏမိုးဝင်ခိုနေတုန်း သူများအတွဲတစ်အတွဲ ခေါက်ဆွဲပြုတ်တစ်ခွက်ကို ကြင်ကြင်နာနာဝေမျှစားနေတာမြင်တော့ ချမ်းချမ်းနဲ့ ကိုယ်ပါစားချင်စိတ်ဖြစ်ရော။ ဒီတော့ ဆိုင်ကိုပတ်ရှာ၊ မတွေ့၊ ဘယ်က၀ယ်ပါလိမ့် သွားမေးချင်၊ မေးကလည်းမမေးရဲ။ ဒါနဲ့ အစ်မတစ်ယောက်နဲ့ လိုက်ရှာကြတယ်။ အတော်ရယ်ရပုံက အဲ့ဒီဆိုင်ကိုမျက်စိရှေ့ထားပြီး ပတ်ပတ်လည်တခြားဆိုင်တွေ လိုက်ရှာနေကြလို့။ နောက်မှ တသြော်သြော်.. နဲ့ လိုရာရသွားပါလေတယ်။ မိုးအေး၊ နှင်းလေတအေးအေးနဲ့ ခေါက်ဆွဲပြုတ်ပူပူလေးကို ရှလူးရှလူးနဲ့နေအောင် စားပစ်လိုက်ပါတယ်။

ပြီးတော့ ပတ်ဝန်းကျင်အလှအပတွေဆီ ရီဝေနေတဲ့အာရုံကို ခဏလွှဲအပ်ထားလိုက်တယ်။ အမှတ်သညာမရှိဘူးတော့ပြောလို့မရဘူး ခုလိုလူအစုအဝေးနဲ့လာရခဲလေတော့ မူးလည်းမူးပဲ။ စုံအောင်တော့ လျှောက်စီးရမှာပဲ။ ပိုက်ဆံတွေလည်းပေးထားရပြီးမှလေ.. ဒီတော့ မှုန်တိမှုန်မှိုင်းမြင်နေရတဲ့ နောက် target တစ်ခုဆီကို အားမလိုအားမရလှမ်းကြည့်လိုက်မိတယ်..

ဆက်ရန်..

.

.

p.s)

ဦးနော်ကြီး၊ ကိုဖိုးစိန်နဲ့ ဖြိုးလေး(Evergreen Phyo) ပြောသလိုပဲ ဘလော့ဂါတွေစုပြီးတော့ အဲ့ဒီလိုတောင်ပေါ်ခရီးမျိုး ပျော်ပျော်ပါးပါးကြီး သွားချင်ပါတယ်။ ဒါက ကျွန်တော်အိပ်မက်နေတဲ့အရာတစ်ခုဆိုလည်းဟုတ်တယ်။ မဖြစ်နိုင်ဘူးမရှိပါဘူး။ ဒီဇင်ဘာလာကြမယ့် အဖွဲ့တွေနဲ့အတူစုံစမ်းပြီး ဒီဘက်ကမ်းကို အဲ့ဒီကသာ လူစုပြီးကူးလာခဲ့..။ အားငယ်နေတဲ့ ကလေးလေးတစ်ယောက်ရဲ့ အထီးကျန်နေမယ့်မွေးနေ့ပွဲလေးကို ပျော်အောင်ဖန်တီးပေးနိုင်မယ့်အပြင် မမေ့နိုင်တဲ့အမှတ်တရတွေလည်း ကြုံချင်ရင်ပေါ့။